Мiнicтэрства эканомiкi Рэспублiкi Беларусь
Сёння, 30 чэрвеня 2026 года, калектыў Міністэрства эканомікі адзначае прафесійнае свята і знакавы юбілей: 105 гадоў таму была створана Дзяржаўная планавая камісія – будучы Дзяржплан БССР, а ў далейшым – Міністэрства эканомікі.
У мерапрыемстве прынялі ўдзел ганаровыя госці, ветэраны галіны, супрацоўнікі Міністэрства.
Адкрываючы ўрачысты сход, міністр эканомікі Юрый Чабатар зачытаў віншавальныя адрасы ад імя Прэзідэнта Рэспублікі Беларусь Аляксандра Лукашэнкі і Старшыні Савета Рэспублікі Нацыянальнага сходу Наталлі Качанавай.
Кіраўнік ведамства адзначыў, што поспехі нацыянальнай эканомікі – гэта вынік штодзённай, карпатлівай працы кожнага спецыяліста, і пажадаў калектыву згуртаванасці, творчага натхнення, быць годнымі пераемнікамі эканамістаў мінулых гадоў і прыкладам для будучых пакаленняў спецыялістаў.
«За 105 гадоў эканамічныя органы Беларусі прайшлі вялікі шлях – ад распрацоўкі першых гаспадарчых планаў да сучасных праграмных дакументаў. Сёння наша задача – абапіраючыся на трывалы падмурак, закладзены папярэднікамі, выпрацоўваць прарыўныя рашэнні і знаходзіць новыя пункты росту эканомікі», – падкрэсліў Юрый Чабатар.
Пажаданне ад Савета ветэранаў Мінэканомікі перадаў Барыс Андрэевіч Макейчанка: наш паважаны калега на пасадах першага намесніка старшыні Дзяржплана БССР і намесніка міністра эканомікі ўнёс значны ўклад у развіццё эканомікі краіны.
Свае віншаванні калектыву адрасавалі госці ўрачыстага мерапрыемства – намеснік Старшыні Праўлення Нацыянальнага банка Рэспублікі Беларусь Андрэй Картун, намеснік Старшыні Прэзідыума НАН Беларусі Сяргей Шчарбакоў, міністр юстыцыі Яўген Каваленка, першы намеснік Міністра архітэктуры і будаўніцтва Уладзімір Навумовіч, дырэктар НДЭІ Мінэканомікі Наталля Берчанка.
Кульмінацыяй святочнага мерапрыемства стала ўручэнне супрацоўнікам узнагарод Савета Міністраў, Міністэрства эканомікі і іншых дзяржорганаў. Маладым спецыялістам ва ўрачыстай абстаноўцы ўручылі службовыя пасведчанні–сімвал пачатку прафесійнага шляху ў эканамічных органах краіны.