Алеся Абраменка: Стратэгія развіцця СЭЗ–2030 павінна забяспечыць якасны скачок і павысіць канкурэнтаздольнасць рэзідэнтаў на знешніх рынках

Сёння, 10 ліпеня 2025 года, намеснік Міністра эканомікі Алеся Абраменка здзейсніла рабочую паездку ў горад Гомель на тэрыторыю свабоднай эканамічнай зоны «Гомель-Ратон».

Праграма візіту пачалася з наведвання вытворчых пляцовак рэзідэнтаў зоны. ІПУП «Веза-Г» спецыялізуецца на распрацоўцы, вырабе і рэалізацыі вентыляцыйнага абсталявання і кліматычнай тэхнікі, уваходзіць у групу кампаній «ВЕЗА» — аднаго з прызнаных лідараў галіны ў СНД. Кіраўніцтва прадпрыемства прадэманстравала новы вытворчы цэх, абмеркавала з намеснікам Міністра перспектывы рэалізацыі праекта і амбіцыйныя планы па пашырэнні вытворчасці ўжо ў 2026 годзе.

У рамках паездкі Алеся Абраменка азнаёмілася таксама з вытворчасцю палімерных шматслаёвых бар’ерных плёнак і пакетаў ТАА «ФрэшпакСалюшэнс». У гэтым месяцы прадпрыемства запускае новыя вытворчыя лініі з высокатэхналагічным абсталяваннем, а ў найбліжэйшыя гады плануецца будаўніцтва новага корпуса плошчай каля 13 тыс. м².

«Прадпрыемствы такога ўзроўню — фундамент тэхналагічнага росту рэгіёна і крыніца высокапрадуктыўных працоўных месцаў. Іх поспех — пераканаўчае пацвярджэнне эфектыўнасці прэферэнцыйнага рэжыму СЭЗ, інвестыцыйнай прывабнасці, інжынернага і кадравага патэнцыялу Гомельшчыны», — падкрэсліла намеснік Міністра.

На пляцоўцы адміністрацыі СЭЗ «Гомель-Ратон» прайшло рабочае пасяджэнне з удзелам кіраўніцтва адміністрацыі зоны і Гомельскага аблвыканкама. Асноўнымі тэмамі сталі вынікі працы за першае паўгоддзе 2025 года і праект Стратэгіі развіцця СЭЗ на 2025–2030 гады.

«Першае паўгоддзе задало пазітыўны рытм: ключавыя паказчыкі рэзідэнтаў упэўнена растуць. Гэта сігнал да актывізацыі працы і фокусу на стратэгіі. Распрацоўваемая “дарожная карта” развіцця СЭЗ павінна забяспечыць якасны скачок: вызначыць новыя інвестыцыйныя прыярытэты, вывесці інфраструктуру на новы ўзровень і ўзмацніць канкурэнтаздольнасць рэзідэнтаў на глабальных рынках», — заявіла Алеся Абраменка.

Па выніках візіту намеснік Міністра эканомікі вызначыла ключавыя задачы для адміністрацыі СЭЗ «Гомель-Ратон» на найбліжэйшы перыяд:

·                      высокія тэмпы інвестыцый: рост укладанняў у асноўны капітал павінен скласці не менш як у 1,7 раза да ўзроўню 2024 года, у тым ліку за кошт прыцягнення новых рэзідэнтаў;

·                      інфраструктура — як прыярытэт: працягнуць развіццё інжынерных сетак і транспартнай даступнасці зоны — крытычна важнага фактару для інвестараў;

·                      Стратэгія ў дзеянні: зацвердзіць і пачаць рэалізацыю комплекснай Стратэгіі развіцця СЭЗ на 2025–2030 гады, скіраванай на ўмацаванне пазіцый зоны як вядучага прамысловага і інавацыйнага хаба рэгіёна.

«Рэалізацыя гэтых задач дазволіць СЭЗ «Гомель-Ратон» не толькі забяспечыць высокія пазіцыі сярод беларускіх тэрыторый з асаблівым гаспадарчым рэжымам, але і стаць магутным драйверам сацыяльна-эканамічнага развіцця Гомельскай вобласці», — падсумавала Алеся Абраменка.