Аляксей Зубовіч: дзяржава актыўна падтрымлівае праекты, накіраваныя на паглыбленую перапрацоўку мясцовай сыравіны

Пра гэта заявіў сёння, 5 мая 2026 года, намеснік Міністра эканомікі Аляксей Зубовіч, наведваючы з рабочай паездкай Бабруйскі раён Магілёўскай вобласці.

Намеснік кіраўніка эканамічнага ведамства прыняў удзел у пасяджэнні мясцовага райвыканкама, дзе падводзілі вынікі сацыяльна-эканамічнага развіцця і выканання бюджэту рэгіёна ў студзені-сакавіку бягучага года.

Паводле ацэнкі Аляксея Зубовіча, раёну ўдалося дабіцца нядрэнных вынікаў: у сельскай гаспадарцы – атрымаць добрую прыбаўку па мясе і малаку, у вытворчай сферы – нарасціць аб'ёмы выпуску, з апярэджаннем выканаць заданні па будаўніцтву жылля, а таксама папоўніць новымі праектамі свой інвестыцыйны партфель.

«Мінэканомікі, як рэгулятар у сферы інвестыцый, з задавальненнем адзначае высокую цікавасць да крэдытных праграм пад прыярытэты Праграмы-2030, якія дзейнічаюць пад агульным парасонавым прадуктам «Рэгіянальная ініцыятыва».

На 1 мая 2026-га ад Магілёўскай вобласці ў гэтым пуле прадстаўлена больш за 60 праектаў коштам звыш 125 млн рублёў, з іх 4 будуць увасабляцца ў жыццё ў Бабруйскім раёне», – адзначыў намеснік Міністра эканомікі.

Рабочы візіт Аляксея Зубовіча завяршыўся маніторынгам ходу рэалізацыі інвестпраектаў на прадпрыемствах раёна. ААТ «Красный пищевик»  пастаянна абнаўляе асартымент выпускаемай прадукцыі, у планах – усталёўка новай лініі па вытворчасці 3Д мармеладу. Бабруйскі мясакамбінат таксама актыўна інвестуе ў сваё тэхналагічнае абнаўленне, рэалізуючы праект па ўзвядзенні цэха паўфабрыкатаў у комплексе з халадзільнымі камерамі, аміячна-кампрэсарным цэхам і кацельняй.

З кіраўніцтвам кампаній намеснік Міністра эканомікі абмеркаваў бягучыя пытанні рэалізацыі інвестпраектаў і далейшыя планы развіцця. Аляксей Зубовіч падкрэсліў, што дзяржава сістэмна падтрымлівае перспектыўныя праекты, нацэленыя на імпартазамяшчэнне і паглыбленую перапрацоўку мясцовай сыравіны.