Юрый Чабатар: працягнем падтрымліваць праекты, якія робяць рэгіёны мацнейшымі
Пра гэта заявіў сёння, 27 жніўня 2025 г. міністр эканомікі Юрый Чабатар, наведваючы з рабочай паездкай Мядзельскі і Вілейскі раёны Мінскай вобласці.
У Мядзельскім раёне кіраўнік эканамічнага ведамства сустрэўся з супрацоўнікамі УП «Наносы отдых». Падчас размовы з калектывам прадпрыемства Юрый Чабатар распавёў аб бягучым стане эканомікі і адказаў на пытанні, якія цікавяць супрацоўнiкаў. Вялікая ўвага была ўдзелена перспектывам развіцця рэгіёна.
Як адзначыў кіраўнік эканамічнага ведамства, у кожнага раёна ёсць унікальныя рысы і магчымасці, на аснове якіх у новай пяцігодцы ім будзе зададзены свой маштабны вектар развіцця.
«Адным з прыярытэтных напрамкаў развіцця эканомікі стане турызм. А Мядзельшчына – раён, дзе ўжо гістарычна склалася інфраструктура для адпачынку і аздараўлення. Гэты патэнцыял трэба развіваць і далей.
Новыя механізмы інвестыцыйнага заканадаўства, камфортныя крэдытныя прадукты ўжо сёння дазваляюць аказаць падтрымку ініцыятывам, важным для эканомікі рэгіёнаў па-за залежнасці ад іх спецыялізацыі. Варта аператыўна выкарыстоўваць гэтыя магчымасці для фарміравання пула бізнес – ідэй новай пяцігодкі», – падкрэсліў Юрый Чабатар.
У працяг рабочай паездкі Міністр эканомікі наведаў шэраг прадпрыемстваў. На Нарачанскім вытворчым участку Мінскага малочнага завода №1 Юрый Чабатар азнаёміўся з ходам работ па тэхналагічным абнаўленні прадпрыемства. Летась тут завершана мадэрнізацыя лініі па вытворчасці элітных сыроў, што дазволіла істотна нарасціць вытворчыя магутнасці.
У Вілейскім раёне кіраўнік Міністэрства наведаў Вілейскую мэблевую фабрыку і ААТ «Зеніт-БелОМА». Міністр абмеркаваў з кіраўнікамі актуальныя пытанні дзейнасці кампаній, планы далейшага развіцця. На «Зеніт-БелОМА» рэалізаваны інвестпраект па выпуску аптычнага абсталявання і аўтакампанентаў. Выхад на праектную магутнасць дасць магчымасць павялічыць выручку прадпрыемства ў 2 разы, экспарт у 3 разы.
«Дзяржава працягне падтрымліваць праекты, якія дазваляюць не толькі забяспечваць патрэбнасці ўнутранага рынку, але і нарошчваць экспарт», – акцэнтаваў Юрый Чабатар.