Алеся Абраменка: «Вялікі камень» дынамічна развіваецца

Аб гэтым заявіла 4 сакавiка 2024 года намеснік Міністра эканомікі Алеся Абраменка падчас наведвання індустрыяльнага парку «Вялікі камень». Мерапрыемства стала ключавым у рамках падвядзення вынікаў працы свабодных (асаблівых) эканамічных зон у 2023 годзе.

«Развіццю парка надаецца дастатковая ўвага на ўсіх узроўнях і, на мой погляд, праект цалкам апраўдвае ўскладзеныя на яго чаканні. Агульная сума выплачаных у бюджэт падаткаў з пачатку дзейнасці рэзідэнтаў і сумеснай кампаніі склала больш за 120 млн дол. Гэта ў 3 разы больш, чым выдаткі дзяржавы на інфраструктуру.

У мінулым годзе працягнуўся рост асноўных паказчыкаў рэзідэнтаў. У параўнанні з 2022 г. аб'ём вытворчасці вырас у 1,6 раза, выручка – у 1,5 раза, сума падаткаў, збораў і плацяжоў, выплачаных рэзідэнтамі парку – у 1,8 раза. Экспарт тавараў павялічыўся не так значна, разам з тым, тэндэнцыя станоўчая», – адзначыла намеснік кіраўніка эканамічнага ведамства.

Падчас наведвання парку Алеся Абраменка азнаёмілася з шэрагам дзеючых вытворчасцей і інфраструктурных аб'ектаў, сярод якіх вытворчыя пляцоўкі рэзідэнтаў парку ТАА «Ронтек машын тулс», які рэалізуе праект па вытворчасці станкоў з праграмным кіраваннем, ТАА «ЗУМЛІЁН БЕЛ-РУС», які ажыццяўляе выпуск будаўнічай тэхнікі, аўтакранаў, тэхнікі для ўборкі дарог, медыцынскі цэнтр «Эксперт +», які аказвае паслугі ў галіне стаматалогіі, касметалогіі, традыцыйнай кітайскай медыцыны.

У завяршэнні рабочага візіту намеснік міністра эканомікі прыняла ўдзел у цырымоніі рэгістрацыі новага рэзідэнта парку – ТАА «Завод Геркон». Кампанія плануе рэалізаваць праект па вытворчасці аўтамабільных электратэхнічных і электронных сістэм.

«Гэтая прадукцыя ўяўляе асаблівую важнасць і будзе запатрабавана айчыннымі флагманамі машынабудавання - МАЗ, БелАЗ, МТЗ. Мы ўскладаем сур'ёзныя надзеі на гэты праект і верым у яго поспех», – падкрэсліла Алеся Абраменка.