Андрэй Картун: Беларусь працягвае дыверсіфікаваць экспарт, нарошчваючы сваю прысутнасць на рынках «далёкай дугі»
Аб гэтым заявіў Першы намеснік Міністра эканомікі Андрэй Картун у перадачы «Экономическая среда» тэлеканала «Беларусь-1».
Паводле слоў Андрэя Картуна, у бягучых умовах Беларусь працягвае нарошчваць сваю прысутнасць на рынках дружалюбных краін, выбудоўваючы новыя гандлёва-эканамічныя сувязі.
На афрыканскім кантыненце апорныя кропкі вызначаны – гэта Егіпет, Нігерыя, Экватарыяльная Гвінея, ПАР. Сумарная ёмістасць імпарту гэтых чатырох краін ацэньваецца больш як на 100 млрд долараў.
«Мы актыўна працуем з гэтымі рынкамі. Для гэтага выкарыстоўваем розныя інструменты: дыпламатычныя каналы, дапамога ў плацяжах і гэтак далей.
У рамках традыцыйных механізмаў падтрымкі – гэта Указы № 534, 466 і 412, экспарцёры могуць атрымаць даступнае фінансаванне за кошт больш нізкіх ставак па крэдытах, кампенсацыі часткі затрат на ўдзел у выставах, сертыфікацыі прадукцыі.
Гаворка ідзе і аб фінансавых інструментах падтрымкі – гэта так званае перадэкспартнае фінансаванне. Таксама актыўна развіваюцца і нефінансавыя інструменты. Напрыклад, кампенсацыйны гандаль. Магчымасці падставіць плячо прадпрыемствам-экспарцёрам адшукваюць і банкі, у тым ліку выкарыстоўваючы такія схемы, як факторынг (пошук контрагентаў, каб выключыць рызыкі неплацяжоў)», – распавёў Першы намеснік кіраўніка эканамічнага ведамства.
Падчас абмеркавання пытання ўкаранення ў прамысловай галіне комплекснай сістэмы дзяржаўнага планавання, Андрэй Картун нагадаў, што яе элементы ўжо трэці год прымяняюцца Урадам у рамках мабілізацыйнага падыходу і мэтавага планавання.
«Яго сутнасць заключаецца ў тым, што існуючыя рэсурсы (фінансавыя, працоўныя), скажам, у прамысловасці трэба максімальна задзейнічаць, каб выйсці на мэтавы ўзровень вытворчасці прадукцыі – трактароў, камбайнаў, грузавікоў і гэтак далей.
Нацыянальная сістэма планавання і прагназавання ў цэлым перабудоўваецца з улікам абноўленага ў мінулым годзе заканадаўства.
Мы пачалі ўжо распрацоўку доўгатэрміновых і сярэднетэрміновых праграм сацыяльна-эканамічнага развіцця, заклаўшы ў іх прынцып каскадавання. Гэта азначае, што ў доўгатэрміновай стратэгіі развіцця ставяцца амбіцыйныя мэты, выкананне якіх «разгортваецца» ў сярэднетэрміновых праграмах і гадавых планах», – растлумачыў Першы намеснік міністра эканомікі.
Адказваючы на пытанне аб сакрэце поспеху ў экспарце для айчынных прадпрыемстваў, Андрэй Картун заклікаў менеджмент трансфармаваць вытворчыя стратэгіі ў маркетынгава-вытворчыя.
«Галоўнае, для любога бізнэсу – гэта продажы. Таму неабходна фармаваць карпаратыўную культуру якасці і больш актыўна прасоўваць свой прадукт. У Год якасці гэтыя задачы як ніколі актуальныя», – рэзюмаваў Першы намеснік кіраўніка Міністэрства.