Ірына Скачкова: Указ №155 дазволіў удасканаліць дзейнасць садоўніцкіх таварыстваў
Пра гэта расказала кансультант юрыдычнага ўпраўлення
Мінэканомікі Ірына Скачкова ў інтэрв'ю «Сельскай газеце».
Адно з пытанняў, якое традыцыйна з'яўляецца прадметам
актыўных дыскусій у дачнікаў, – памер членскіх узносаў у СТ. Як нагадала
прадстаўнік Мінэканомікі, раней члены таварыстваў плацілі аднолькава незалежна
ад памераў зямельных участкаў.
«Указ №155 «Аб садоўніцкіх таварыствах» дае права
агульнаму збору членаў СТ самастойна вызначаць парадак фармавання памераў узносаў.
Такая змена, на нашу думку, дазволіць стварыць больш спрыяльны мікраклімат у
садоўніцкіх таварыствах, удасканаліць механізм самарэгулявання і
самаарганізацыі працы таварыстваў», – адзначыла Ірына Скачкова.
Каменціруючы яшчэ адно важнае новаўвядзенне - неабходнасць абавязковага афармлення
правазасведчвальных дакументаў на зямельны ўчастак, прадстаўнік Міністэрства
рэкамендавала зрабіць гэта больш аператыўна.
«Варта адзначыць, што такіх участкаў у краіне не так
ужо і шмат. Тыя, хто сапраўды зацікаўлены ў землекарыстанні і шануе сваю
маёмасць, як правіла, даўно аформілі свае ўчасткі.
Праз тры гады
мясцовыя ўлады пры выяўленні незарэгістраваных участкаў стануць выпісваць
прадпісанні, а ў выпадку іх невыканання будуць забіраць участкі ў адпаведнасці
з заканадаўствам аб ахове і выкарыстанні зямель», – падкрэсліла Ірына Скачкова.
Адна з найбольш значных навацый дакумента, на думку
Ірыны Скачковай, – магчымасць перадачы ў дзяржуласнасць электраэнергетычнай
інфраструктуры таварыстваў, што дасць магчымасць стварыць умовы для яе
развіцця.