Юрый Чабатар: палепшыць наша жыццё можам толькі мы самі

Аб гэтым заявіў сёння Міністр эканомікі падчас рабочай паездкі ў Смаргонскі раён.

Кіраўнік эканамічнага ведамства наведаў ААТ «Смаргонскі агрэгатны завод» і сустрэўся з працоўным калектывам. Падчас размовы з работнікамі Юрый Чабатар расказаў, як спрацавала беларуская эканоміка ў мінулым годзе і аб задачах на 2024-ы. Абмеркавалі вынікі працы прадпрыемства, пытанні нарошчвання аб'ёмаў вытворчасці і збыту прадукцыі, узровень зарплаты.

Асобнай тэмай гутаркі стала правядзенне ў Беларусі Года якасці. На думку Міністра, якасць нашага жыцця непасрэдна залежыць ад эфектыўнасці нашай працы, зацікаўленасці кожнага ў высокім выніку, жадання і імкнення ствараць.

«Попыт на беларускія тавары ў свеце высокі. Коштавыя аб'ёмы экспарту ў 2023-м максімальныя за апошнія 11 гадоў. Але канкурэнцыя з кожным годам узмацняецца. І каб захаваць і прымножыць дасягнутае, важна павышаць якасць сваёй працы, кожнаму на сваім працоўным месцы. Ад гэтага залежыць канкурэнтаздольнасць нашай прадукцыі, паслуг, а значыць – узровень дабрабыту краіны ў цэлым і кожнага чалавека», – падкрэсліў Юрый Чабатар.

Рабочы дзень кіраўніка Міністэрства прадоўжыўся наведваннем шэрага прадпрыемстваў рэгіёну: ТАА «Ультрадэкор», ТАА «Ультра Плай» і ТАА «Еўрапластэкс Інвест». Міністр азнаёміўся з ходам рэалізацыі інвестпраектаў у рамках даручэння Кіраўніка дзяржавы «Адзін раён-адзін праект», абмеркаваў з зацікаўленымі праблемныя пытанні.

«Да гэтых праектаў неабходна падыходзіць з усёй адказнасцю: своечасова вырашаць пытанні з фінансаваннем, пастаўкай абсталявання, строга выконваць тэрміны выканання работ. Рэалізацыя такіх праектаў істотна ўмацуе вытворчы і экспартны патэнцыял рэгіёну, дасць магчымасць павысіць узровень жыцця яго жыхароў», – падкрэсліў Міністр эканомікі.