Супрацоўнікі Мінэканомікі ўшанавалі памяць ахвяр генацыду ў мемарыяльным комплексе «Масюкоўшчына»

Напярэдадні Дня Перамогі ў Вялікай Айчыннай вайне Міністр эканомікі Юрый Чабатар разам з супрацоўнікамі ведамства ўсклаў кветкі да манумента ў мемарыяльным комплексе «Масюкоўшчына», а таксама ўшанаваў памяць загінуўшых хвілінай маўчання.

За тры гады нямецка-фашысцкай акупацыі тут, у лагеры для ваеннапалонных, было закатавана больш за 80 тысяч савецкіх салдат, афіцэраў, мірных жыхароў.

«У гэтыя дні мы шануем памяць нашых продкаў, якія ваявалі за мірнае неба над нашай Радзімай. Сёння гэтая тэма зноў актуальная. Мы бачым, што вакол нас адбываецца. І ключавой становіцца памяць. Пакуль яна жывая, зверствы, якія адбываліся на нашай тэрыторыі, дапусціць нельга», – сказаў Міністр эканомікі.

Юрый Чабатар адзначыў, што для супрацоўнікаў Мінэканомікі гэта таксама сімвалічна.

«Падчас вайны працаўнікі дзяржплана праявілі сябе на палях бітваў. А пасля – працавалі над аднаўленнем эканамічнага патэнцыялу Беларусі.

Многія прадпрыемствы, будаўніцтва якіх пачалося ў пасляваенны перыяд, з'яўляюцца нашымі флагманамі. Сёння перад намі стаіць задача захаваць і прымножыць гэтыя дасягненні. Мы ў гэтым напрамку працуем. У гэтым заключаецца пераемнасць і памяць», – падкрэсліў Міністр эканомікі.