Уладзімір Навумовіч: Закон істотна пашырае кола атрымальнікаў і крыніцы фінансавай падтрымкі бізнесу

Аб гэтым заявіў сёння, 2 мая 2024 г., намеснік Міністра эканомікі Уладзімір Навумовіч на прэс-канферэнцыі на тэму «Асноўныя навацыі рэформы сістэмы прадпрымальніцкай дзейнасці». Мерапрыемства праходзіла на пляцоўцы Нацыянальнага прэс-цэнтра Рэспублікі Беларусь з удзелам прадстаўнікоў Мінэканомікі, Мінфіна, МПЗ, Мінюста, Дзяржкаммаёмасці, ФСАН.

Па словах намесніка кіраўніка эканамічнага ведамства, Закон закранае розныя сферы дзейнасці – прадпрымальніцтва, сацыяльныя і працоўныя адносіны, фінансы.

«Галоўная і чаканая многімі навацыя дакумента – механізм спрошчанага пераходу ад ІП да юрыдычнай асобы з захаваннем правоў і абавязкаў.

Законам замацоўваецца новая структура бізнэсу, якая складаецца з двух катэгорый. Першая – юрыдычныя асобы: малыя (да 100 чалавек) і сярэднія (да 250 чалавек) Другая – фізічныя асобы. Гэта рамеснікі, уладальнікі аграсядзіб, індывідуальныя прадпрымальнікі і «самазанятыя» Для дзвюх апошніх катэгорый да 1 ліпеня Урадам будуць вызначаны пералікі дазволеных відаў дзейнасці.

Да 8 мая будуць адпрацоўвацца ўсе прапановы органаў дзяржкіравання і мясцовых выканаўчых органаў па праектах пералікаў. 15 мая яны будуць размешчаны на Прававым форуме Беларусі для грамадскага абмеркавання.

У Законе таксама знайшлі адлюстраванне новыя формы падтрымкі прадпрымальнікаў у выглядзе паручальніцтваў, грантаў, бюджэтных трансфертаў», – нагадаў Уладзімір Навумовіч.

Як адзначыла намеснік дырэктара Дэпартамента па прадпрымальніцтве Ірына Бабачонак, кожны індывідуальны прадпрымальнік напрацаваў пэўны багаж дакументаў.

«Усе дазволы, ліцэнзіі і іншыя дакументы падобнага характару, атрыманыя ІП, пры рэгістрацыі юрасобы пераходзяць да новай камерцыйнай арганізацыі. Гэтымі дакументамі можна будзе карыстацца цягам года. У далейшым іх пераафармленне будзе ажыццяўляцца бясплатна і па заяўным прынцыпе.

Яшчэ адным стымулам пераходу ў юрыдычную асобу з'яўляецца «абнуленне» перыяду льгот і прэферэнцый для ІП, якія працуюць у малых гарадах і сельскай мясцовасці, у рамках Дэкрэта № 6. Для новай камерцыйнай арганізацыі гэты сямігадовы тэрмін пачынае ісці нанова.

Акрамя гэтага, паводле агульнага правіла, новая юрыдычная асоба на працягу двух гадоў з даты рэгістрацыі не можа быць уключана ў планы выбарачных праверак.

Таксама важны аспект – пры рэгістрацыі ІП камерцыйнай арганізацыі па месцы свайго жыхарства аплата камунальных паслуг за жылое памяшканне застанецца такой жа, як для фізічнай асобы», – растлумачыла прадстаўнік Мінэканомікі.