Мытнае рэгуляванне, мытна-тарыфнае і нетарыфнае рэгуляванне

Мытна-тарыфнае рэгуляванне ў Рэспубліцы Беларусь ажыццяўляецца ў адпаведнасці з правам Еўразійскага эканамічнага саюза (ЕАЭС). 

Элементамі мытна-тарыфнага рэгулявання з’яўляюцца: 

- Адзіная таварная наменклатура знешнеэканамічнай дзейнасці ЕАЭС;

- Адзіны мытны тарыф ЕАЭС;

- Адзіныя правілы вызначэння краіны паходжання.

У Еўразійскім эканамічным саюзе на мытнай тэрыторыі дзяржаў-членаў ЕАЭС прымяняюцца адзіныя меры мытна-тарыфнага рэгулявання.

Паўнамоцтвы па прыняцці рашэнняў у сферы мытна-тарыфнага рэгулявання ў адпаведнасці з Дагаворам аб Еўразійскім эканамічным саюзе ад 29 мая 2014 года перададзены наднацыянальнаму органу – Еўразійскай эканамічнай камісіі (ЕЭК). Рашэнні ЕЭК уваходзяць у дагаворна-прававую базу ЕАЭС і падлягаюць непасрэднаму прымяненню на тэрыторыях дзяржаў-членаў ЕАЭС.

Рашэнні ЕЭК і Вышэйшага Еўразійскага эканамічнага савета публікуюцца на афіцыйным інтэрнэт-сайце ЕЭК – афіцыйнай крыніцы апублікавання рашэнняў і матэрыялаў органаў Еўразійскага эканамічнага саюза (www.eurasiancommission.org).

Да тавараў, што ўвозяцца ў Рэспубліку Беларусь з трэціх краін, прымяняюцца стаўкі ўвазных мытных пошлін Адзінага мытнага тарыфа Еўразійскага эканамічнага саюза, зацверджанага Рашэннем Савета ЕЭК ад 16 ліпеня 2012 года №54 (са зменамі і дапаўненнямі). 

У Рэспубліцы Беларусь дзейнічае шэраг нарматыўных прававых актаў, якія ўстанаўліваюць стаўкі вывазных мытных пошлін у адносінах тавараў, якія вывозяцца з тэрыторыі Рэспублікі Беларусь за межы мытнай тэрыторыі Еўразійскага эканамічнага саюза:

калійныя ўгнаенні;

насенне рапсу;

лесаматэрыялы;

неапрацаваныя шкуры, дубленая скура;

нафта і нафтапрадукты.

У межах ЕАЭС створаны адзіны механізм прымянення спецыяльных абаронных, антыдэмпінгавых і кампенсацыйных мер у дачыненні да імпарту тавараў з трэціх краін. Дадзеныя меры прымяняюцца пасля правядзення раследвання і прыняцця па яму адпаведнага рашэння.

У адпаведнасці з Дагаворам аб Еўразійскім эканамічным саюзе ад 29 мая 2014 года ў гандлі з трэцімі краінамі ЕАЭС прымяняюцца адзіныя меры нетарыфнага рэгулявання (артыкул 46), якія ўстанаўліваюцца ў адпаведнасці з парадкам, вызначаным у дадатку №7 да названага Дагавора. 

Адзінымі мерамі нетарыфнага рэгулявання з’яўляюцца:

забарона ўвозу і (ці) вывазу тавараў;

колькасныя абмежаванні ўвозу і (ці) вывазу тавараў;

выключнае права на экспарт і (ці) імпарт тавараў;

аўтаматычнае ліцэнзаванне (назіранне) экспарту і (ці) імпарту тавараў;

дазваляльны парадак увозу і (ці) вывазу тавараў.

Увод забаронаў і дазваляльнага парадку рэгламентавана Рашэннем Калегіі ЕЭК ад 21 красавіка 2015 г. №30 (са змяненнямі і дапаўненнямі).

Палажэнні Дагавора аб Еўразійскім эканамічным саюзе ад 29 мая 2014 года дазваляюць дзяржавам-членам ЕАЭС таксама ўводзіць і прымяняць у гандлі з трэцімі краінамі меры нетарыфнага рэгулявання ў аднабаковым парадку на часовай аснове.